PE RAWH U TICHUAN PEKIN IN AWM ANG

He Isua thusawi “Pe rawh u, tichuan pekin in awm ang” tih thu leh mihring suala tlu tawhte rilru puthmang hi chhim leh hmar anga thil inpersan a ni tlat.  Mihring \hinlung chuan, “laksak ila, ka nei tam lehzual ang” tih hi kan rilru put dan a ni.  He rilru avang hian ram leh ram an indo va, khua leh khua, hnam hrang leh hnam hrang an inbei a, thenawm an inngeih lo va, chhungkua thlengin kan buai phah pheng phung mai chu anih hi!

He khawvel chungnun nih duhna ram, a chak apiang dinchanna, a thei apiang thuneihna ramah hian general ropui, ramdangte thilneih chhuhsak thei thei te an larin an kaisang chak a.  Tin, general-te mai ni lovin, infiam mite leh politician-te ngei pawh midang rapbet thei apiang an dingchang a.  Sumdawngte leh sikul naupang thlengin an bang bik lo, midang aia chungnun nih inchuhin \an an la sauh sauh a, kan zavai mai hian midangte pe tu ni lovin laksak theitu nih tumin mi aia sanga awm turin kan hman hlel a,  kan intlansiak mup mup chu anih ber hi.   

In sang neih siakah mai pawh ni lovin, a design kan ti, furniture kan ti, thenawm te tluk loh kan hlau mai pawh a ni lo, anni aia chungnun tum ta reng rengin kan hmanhlel a.  He chungnun nih duhna hian kohhran pawh a zuah bik lo.  Kohhran chaklo zawkte puih ahnekin biakin neih len leh neih mawiah kan intlansiak a, kan rawngbawlna te pawh kohhran dang rahbeh duhna vang leh midang aia rawngbawltu \ha zawk nih duh vang mai mai chu a ni ta deuh ber chu anih tak hi!

Hetiang khawvela “pe rawh u, tichuan pekin in awm ang” han tih chu mi a \awngkam ni awma mawi a ni.  Khawi maw lai thingtlangpa thusawi chu ni se, tuman benga rawngah kan thun kher lo ang.  Mahse a sawitu hi mi namai a ni lo, mihringte min siam a, min dinchhuaktu a ni a.  Ani ang tluka mihringte min hrechiangtu an awm lo.  Thu \ha zawm atan \ha a sawi mai a ni lova, mihring nun innghahchhan lungphum ril zawk Isua chuan hetah hian a sawi a ni.

Pathian min siamtu hi hmangaihna Pathian a ni a (I Johana 4:8).  Ani chuan Ama anpuiin, hmangaihna nunpui turin min siam a.  Chu hmangaihna chu midang tana inpekna hi a ni.  Mahse Setana’n sualah kan nu leh pa hmasa te chu thlem thluin Pathian anpui kan nih chu laksak niin Diabola anpui (Johana 8:44) kan lo ni ta a.  Hmangaihna leh midang tana inpekna ni tawh lovin, tunah chuan duhamna leh chapona chuan mihringte min lo thunun ta a ni. 

Mahse engkik lai mahin mahni inhaivurna leh midangte rahbehna hian hlimna tluantling tak tak min thlen ngai lo.  Hmangaihna nunpui tura Pathianin Ama anpuia a din kan nih tlat avangin, hmangaihna nunpui naah hian mihringte hian hlimna kim kan hmu a ni.  Inngaizawng inhmangaih takte chuan khawvel hi nuam an ti a, an kham lo.  Chutiangin chhungkua hmangaihnain ro a relna hmun chu chhungkaw hlim an ni \hin a.   Khawtlang leh kohhran pawh, hmangaihnain ro a relna hmun apiang chu khawtlang hlimthei, kohhran awhawm an lo ni \hin.

Hmangaihna hi inpumpekna tel lovin a awm thei lo.  Hmangaihna chu midang hma – ngaih na hi a ni.  Mahni inhaivurna lam ni lovin midang tana inpek/inphalna zawk a ni.  Khawvela thil dang pawisa te, thawnhnaw te, hun te ngei pawh hi sem ral theih a ni a.  Mahse hmangaihna erawh kan sem hnem poh leh a pung nasa mai a ni.  Chuvang chuan hausakna diktak chu pawisa ngah leh ngah loh ni lovin hmanral ve theih loh hmangaihna thinlung neih leh neih loh zawk hi a ni.   Sum lam ngah tak, mahse thinlung erawh mirethei ni bawk si ka hre teuh, mahse hmangaih/midangte tana inpekna nun neite erawh chu sum ngah lua lo mah se, mi hlimthei, mi awhawm an ni \hin.

Hmangaihna leh midangte tana inpumpekna nun hi thil hlauhawm tak niin a lang a, mahse anihna dik takah chuan he kawng chauh hi hlimna tak tak nei thei tura mihringte tana kawng awmchhun zawk a ni.  Hei thudik hi miin a zir chhuah hma loh chuan hlimna tak tak a nei ngai lovang a, a nupui/pasalte leh midangte hlimna pawh a thlen tak tak ngai lovang.

Isuan, “Tupawh a nunna hmu chuan a chan ang a; keimah avanga a nunna chan chuan a hmu ang” a tih hian nakina vanram kal leh kal loh chungchang mai a sawina a ni lova, tuna kan nun zawk hi a ni a sawi zawk ni.  Mahni inhaivur tum lova, midangte tan leh Pathian tan kan nun leh kan thilneihte kan hman tam dan azir zelin hlimna leh lungngawina hmuin kan nun awmzia tak tak kan hmu thiam thei \hin.

Sum neih tam hi hlimna emaw kan ti mai \hin a, mahse anihna diktakah chuan sum nei tam te zawk hi rilru hah an ni chawk.  Pawisa chuan khum lei thei mah se, muttuina erawh a lei thei lo, damdawi man to tak tak lei thei mah se, hriselna tak tak leh nunna erawh a lei thei chuang lo.  In \ha tak pawh a lei thei a, mahse chhungkaw hlim erawh a lei thei tlat lo.  Nula pawh a lei thei, mahse hmangaihna erawh a lei thei chuang lo.  Sum tam tak tak bank-ah a dah\ha thei a, mahse thlamuanna erawh chu chuan a pe thei chuang lo.  Motor changkang tak tak leh thil chhuak \har apiang pawh a lei thei, mahse lungngawina tak tak erawh a lei thei lo.  Mihring nunril leh mihringte mamawh tak tak, hlimna te, thlamuanna te, tlawmngaihna te, huaisenna te, nunna te, hmangaihna te hi suma lei chi a ni lova, midang tana inpumpekna atanga kan neih turte an ni zawk a ni.

Ka thianpa CVL \hafamkima chuan article ‘hlimna hi pawisain a lei thei’ tih thupuia hmanga a ziaknaah chuan pawisain hlimna a lei theih zia a ziak tlat.  A ziah dan chuan pawisaa hlimna lei tur hian pawisa tam emaw tlem emaw a ngai kher lo va, I neih ang chhun chhun mahni nawmsaknan hmang lo va, midang \anpuina I hman hian pawisaiin hlimna diktak I lei thei a ni tiin a ziak.

Engpawh ni se, Siamtu hian mahni hmasial a, mahni inhaivur turin min duang lo va, A tan leh midang tana nung turin min siam zawk a ni.  He hmangaihna nun hi sualna avangin hloh tawh mah ila, Kristaah chuan Pathianin min lo pe leh ta a ni.  Isuan min pek chhandamna hian vanrama min kaltir ngawr ngawr hi a tum a ni mai lo va, hmangaihna nun kan hloh tawh min rawn pek let leh hi a tum tak zawk chu a ni.  Chuvang chuan Pathian leh kan mihringpuite hi hmangaihnain rawngbawlsak ila, khawvelin a pek theih loh hlimna leh thlamuanna te chuan min chenchilh dawn a ni.  “PE RAWH U, TICHUAN PEKIN IN AWM ANG” titu hian hmangaihna rawngbawl hna thawk turin min siam si a.