MALSAWMNA TEHFUNG

Thuhriltu \henkhatin Sawma pakhat pek \hat chu hausakna, Sabbath serh \hat chu Pathian malsawmna dawnna.  Chuvang chuan hausak leh malsawmna dawn \hat duh chuan Sabbath serh \hat a, Sawma pakhat pek \hat tur tia an sawi ka hre fo thin.  Tin, hmannia Bible Society inkhawmpuia ka kalnaa Speaker phei chuan “in ina sazu zawng zawngte pawh kha life member nihtir ula, an nghal lo mai ang” ti hialin a sawi a ni.  Tak tak ni mai se a lawmawm ang nge a buaithlak zawk ang aw ka ti deuh!  Mi hausa deuh tawh phawt chu an sum lakluh dan ngaihtuah lo lekin ‘Pathian malsawmna dawng’ tiin kan sawi mai bawk thin. 

Ti hian ka ngaihtuah mai mai thin a, sabbath serh \hat te, sawma pakhat pek \hat te hi hausakna leh malsawm dawnna a nih si chuan, Paula khan sabbath a serh \ha vak lo in, sawma pakhat pawh a pe \ha vak lo niin a lang;  in pakhat takngial pawh a nei zo si lo va, a lu an tan daih lehnghal!  Chumai a ni lo Elija te, Habakuka te, Mika te, Petera, Andria te an vai mai khan tumah an hunlaia miten hausa an tih an awm lo.  Isua phei kha chuan thuilohkawr a haklai bak engmah a nei lo.  Sawma pakhat a pe \ha lo nge ni ang, Sabbath nia buhhmuna a kal vang ni zawk ang le?

Pathian mi duhsak Bible-a hming langte zingah hian hausa leh nuamsa chu an awm ve ngei mai, mahse an tam lo khawp mai.  Hebrai bung 11-a rinnaa fakhlawh hote phei kha chu in leh lo pawh nei lo, harsatna leh tihduhdahna chi hrang hrang tuartute, tlang kar leh pukah te vak vak \hin an ni a, thinga zaibun te, vuakte an tuar nasa hle hlawm a ni.  Anih leh heng ho hian Sabbath an serh \ha lovin Pathian thu an awih \ha duh lo em ni ang?  Ni lul love.  Pathian thu an awih \ha a, Sabbath an serh \ha a, sawma pakhat pawh an pe \ha… Pathian pawhin malsawmna chhiar sen lohvin a vur reng a ni.  

Inenchian deuh chu kan ngai lo maw, lu tan sak, thingzainaa zaibun te malsawmna dawn hmu thei lo khawp hian khawvel thil hian kan mit a lo tidel palh ang e.  Tihduhdahna te, retheihna te,  harsatna te hi malsawmna anih theih dan hre pha tawh lo khawp hian khawvel nawmsakna lem mai mai te hian kan thinlung beng a lo tichhet tawh ang e.  Isua chuan, “Thlamuanna ka hnutchhiah che hi hi, Khawvelin a pek ang che u ni lo, Keima thlamuanna ka pek che u hi” (Johana 14:27) tiin min lo hrilh.  Khawvelin malsawmna a tih a chu sum leh pai, in leh lo \ha te hi an ni a, chungah chuan an inthlamuan thin a ni.  Mahse Kristan chutiang malsawmna leh thlamuanna chu min tiam lem lo, Isuan min tiam chu Amah Isua Krista a ni.  Isua Krista hi nunna chhang ei sen rual loh, nunna tuikhur kang ve ngai lo, hausakna chhui sen rual loh diktak chu a ni.

Hausakna kan tehna \hin pawisa hi chuan anihna dik takah chuan mihringte mamawh tak tak hi engmah a lei thei hlei nem.  Pawisa chuan in \ha tak chu a lei thei, mahse hlimna erawh a lei thei lo.  Khum dup nuam tak tak pawh a lei thei, mahse muttuina erawh a lei thei lo.  Len velna tur motor nalh tak tak pawh a lei thei, mahse tehnrual \ha erawh a lei thei lo.  Chaw leh chawhmeh tui ber berte chu a lei mai thei, mahse chawei tuina erawh a lei thei lo, damdawi to tak tak pawh a lei thei a, mahse hriselna erawh a lei thei lo.  Thisen pawh a lei thei, mahse nunna erawh a lei thei lo.  Sana man to tak tak a lei thei a, mahse hun erawh second khat lek pawh a lei thei lo.  Hmeichhia a lei thei a, mahse hmangaihna erawh a lei thei lo.  Bank-ah mamawh huna hman tur tam tak a dah\ha thei a, mahse thlamuanna tak tak erawh a lei thei chuang lo.  Krista erawh chuan mihringtena kan mamawh zawng zawng- thlamuanna te, hlimna te, muttuina te, chatuana nunna te min pe vek thei a ni.  Chuvang chuan malsawmna leh hausak hi sum leh thil neih a\anga teh tur a ni lo, sumin a lei theih loh thil mihringin a neih leh neih loh a\anga teh zawk tur a ni. 

Sawma pakhat pek \hat te, Sabbath serh \hat te hi malsawmna chu a ni teh meuh mai.  Malsawm phut vang ni lo va, hmangaihna leh rinawmna avanga hengte hi kan ti anih chuan sumin a lei theih loh thlamuanna, hmangaihna, hlimna te Kristaa awm chu pekin kan awm dawn a ni.  Anihna takah chuan malsawmna dik zawng zawng te chu Isuaah pekin kan awm vek tawh a, Isuaah van chuan a neih zawng zawng mihringte tan a rawn seng ral tawh a ni.  Mahse van malsawmna Krista chu ni lovin khawvel thil ral leh mai turin kan thinlung a khat tlat a. Kohhran miten Krista malsawmna ni lovin, khawvel malsawmna kan um tlat avangin a ni hlauhna leh rinhlehnain min tihbuai a, kohhran pawh a nun theih miah loh.  Kristaa hausakna hi neih kan chak ber, kan zawn ber anih tak tak hunah he Kohhranah hian ‘Pathian ram’ chu lo thlengin hmangaihna, thlamuanna leh hlimna te chuan ro an rel anga.  Ruah hnuhnung kan sawi fo thin pawh hi lo surin chanchin\ha kan hril zo ang a, chatuan malsawmna leh hausakna chenin hlim tawp hlau lovin kan leng thuai mai dawn a ni.