(Amah ngeiin ama thuziakte a hmuh dan
zirchianna tawi)
Adventist mithiam George R. Knight-a chuan tihian a sawi a,
“Seventhday Adventist-ten an thilpek dawn tha ber chu Ellen G. White-I leh a
rawngbawlna a ni a, chutih rualin Seventh-day Adventist-te’n thilpek an dawn an
chhiat pui ber chu Ellen G. White-I leh a rawngbawlna tho a ni.” Chem chu a hriam poh leh tangkai mahse, in
tihah in insah a hlauhawm thin ang hian Ellen White-I thuziakte hi hmang thiam
tan chuan thil tangkai em em, mahse hmang thiam lo tan chuan bo phah hlauh
theihna a ni.
Tunlaiin Bible leh Ellen G. White-I thuziak inlaichinnah
zawhna leh inhnialna a awm a. Hemi
chungchang hi kan hriat sual palh anih vaih chuan Ellen White-I thuziak hi amah
ngei pawhin a duh lo danin kan chelek thei a, chuvang chuan amahin a thuziakte
leh Bible inlaichin dan a sawite kan thlir thuak thuak dawn a ni.
Kan hriat hmasak tur chu Ellen White-I khan engtik lai mahin
a thuziakte kha miten an nun kaihruaitu bulpui bera an hman kha a duh ngai lo a
ni. “Kan innghahna leh rinna chu
Bible-ah hian a awm a ni” tiin 1894 khan a lo sawi tawh a, “chuvang chuan mi
tumah hi ka thuziakte Bible aia dah hmasa turin ka duh lo a ni” (Evangelism
256). Hemi kum vek hian tihian a lo sawi
bawk, “mipui hmaah rawngbawlnaah in
thusawi tihnghet tura atan Unaunu White-I thuziakte hi hmangin la chhuak ngai
suh ang che u. Hetianga in tih avang
hian miin thuziakte (Ellen White-I thuziakte) an rinna a pun phah chuang lo
vang. In thusawite innghah nan chuan
Pathian thu fiah leh chiang tak hmang zawk ang che u. ‘Lalpan a ti’ tih hi mipuite hnena in thusawi
tifiahtu tha ber a ni. Mi tumah hi Unau
White-I en tura zirtir ni lo sela, engkim ti thei Pathian, Sister White-I hnena thurawn pe
thintu chu en tura zirtir ni zawk rawh se” (3 Selected Messages 29, 30)
1901 kuma kohhran hruaitute hnenah pawh Ellen G. White-I
chuan a thuziak ni lovin Bible zawk dah pawimawh zel turin a ngen nawn leh
a. Hemi tuma kohhran hruaitute hmaa a thusawiah pawh “Unaunu White-I chu sir
kilah” dah turin a hrilh a, tihian a hrilh zui a ni, “Bible awiha in nun hma
loh chuan ka thusawite hi sawn nawn fo lovang che u. Bible hi in chaw, in sa leh in tur bera in
neih a, a thusawite in nuna in lak luh hunah Pathian lak atanga thurawnte pawm
dan in thiam dawn a ni. Vawiin ni hian
Pathian thu hlu(Bible) tak chu in hmaah ka chawisang a. ‘Unaunu White-I chuan tihian emaw, tikhan
emaw a sawi’ tiin ka thusawi tawhte sawi chhawng chhen lovang che u. ‘Israelte Lalpa Pathianin a thusawi chu
nangmahni ngeiin zawng chhuak ula, a sawi ang chuan zawm ang che u” (3 Selected
Messages 33)
A chung Pi White-I thusawi hian a thusawi leh ziahte hi enga
tan mah hman tur a ni lo tih lam a hawi lo.
A theih ang chin chinah kan hmang tangkai ang a, mahse Bible aia hman lar leh
hman nasatah erawh kan nei tur a ni lo.
Bible aia hman uar zawka kan neih
chuan amah Pi White-I thu ngei kan kalh tihna a ni. Kan thusawia Bible chang tlemte lakchhuah a,
Pi White-I ziak zawk sawi vak hi amah ngei pawhin a duh lo em em thil a
ni. Pi White-in a tum ber thin chu mite
Bible-a mite hruai luh hi a ni. Bible aia Pi White-I thuziak sawi vawng tute hi
anihna tak zawkah chuan Pi White-I thurawn kalha chete an ni. A ni kha chuan mite a theih ang tawk tawkin
Bible chauh hi an nun kai hruaitu atana hmang turin a ngen lawm lawm anih kha.
A pasal James White-a leh kan mi hmasate pawh khan hetiang
tho hian an ngai. Ellen G. White-I
thilpek dawn chungchang a ziahna hmasa ber 1847 kuma chhuakah khan tihian James
White-a chuan a lo ziak “ Bible hi inpuanchhuahna thafamkim leh huapzo a ni
a. Kan rinna leh thiltih tehfung awm
chhun a ni. Mahse chutih rual chuan Pathianin hun
hnuhnungah Petera lo sawi anga mumang leh inlarna atangin hun kal tawh, kal
mek leh lo la awm turte ah a thu thlen famkim dan min hrilh dawn lo tihna a ni
lo (Tirhkohte 2:17-20; Joela
2:28-31). Inlarna diktakte chu Pathian leh a thu lama min hruai tura pek an
ni a; mahse Bible-a awm lo rinna leh tirtur min siamtu anih chuan Pathian
atanga lo chhuak a ni lova, kan hnawl ngam tur a ni.” (A Word to the Little Flock, 13)
Kan mi hmasate khan Bible chauh hi rinna tehfung dik lo thei
lovah an ngai a. Chutih rual chuan Joela
leh Petera ten hun hnuhnunga Pathian miten inlarna an la hmuh tur thu a sawi
kha Ellen White-I ah hian thleng famkimin an ngai bawk a ni. Chutih rual chuan Ellen G. White-I
rawngbawlna kha Bible aiawhtu emaw Bible luahlantuah an ngai lo.
Tunlai zawlnei tamtakte chuan an thuziakte chu Thuthlung
pathumna angin an hnungzuitute an zirtir thin a. Mahse hetiang zawng hian Pi White-I hian a ti
ve ngai lo, a hna ber chu Pathian thu “Chawisan leh mite rilru chumi lama hip
a, thutak mawina chu mite hnehtir” (5T 665) a ni.
Koh anihna chhan chu mite “Pathian thu an ngaihthah tawh
lama hruai kir leh” a ni (5T 663). “Ka
thuziakte hi eng thar petu tur ni lovin,
thutak puanchhuaha awm tawhte mi thinlunga chiang taka nem kai anih theihna
tura ziakte an ni” tiin a sawi (5T 665).
A thuziakte hi miten Pathian thu an ngaihsak loh avangin “eng lian zawk
(Bible)-a mipa leh hmeichhiate chu hruai
kir tura eng te zawkte a ni” tiin a sawi
thin (Colporteur Ministry 125).
1871 kum khan a mumangah Bible leh a thuziak tamtakte a hmu a tihian mite hnenah a lo sawi a “Pathian
thu hi in ngaisang lova, Pathian thu hi
in zir lai pui ber, Kristian famkimna in neih theihna tura in tehfungah Bible
hi lo hmang thin ni ula chuan ka
thuziakte hi in mamawh hauh
lovang. Pathian thu thawkkhum fiah leh
chiang tak Pathianin in tana a pek che u chhiar in ngaihthah a, thawkkhum
lehkhabu in ngaihsak loh in awih theih nan leh a zirtirna anga nun thianghlim
leh zirtirnaa chawi kan in nih theih nana ka thute hi ziak an ni” tiin a sawi a
ni (2T 605).
Eng tik lai mahin Pi White-I hian a thuziakte hi bible
aiawhtu emaw Bible tlukpuiah emaw a dah ngai lova, bible lama mite hruai kirtu
leh Bible zirtirna miten an nitin nuna an hman theihna tura puituah a ngai zawk
a ni. Chuvang chuan miten Bible aia a
thuziakte an chhiar tam zawk a, Bible aia rinrawl bera an neih hian amah Pi
White-I ngei an kalh zawk tihna a ni.
Amah Pi White-In a thuziak leh a rawngbawlna a sawi dan ang hrechiang
tak takte chuan hetiang zawng hian a thuziakte hi an kalsualpui ngai lovang a,
a thuziakte an hrethiam tak zet anih
chuan Bible an zir tam phahin Bible thuneihna lo chungnun zia an hmuchiang zawk
ngei ang.
(He article tawi hi George R. Knight lehkhabu ziah Reading
Ellen White behchhana ziah a ni.)
No comments:
Post a Comment