CHHANDAM NAN ENGNGE KA TIH THEIH

Changthlan:  Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e. Ephesi 2:8

Chhandam ka nih theih nan engnge ka tih tur ni ang?  He zawhna hi khawvel mihring tungchhova piang tawh tena kan zawh nasat ber leh a chhanna hriat kan chak berte zinga mi anih ngei a rinawm.  Chuti taka zawhna tlanglawn chu nimahse a chhanna dik hria erawh tlemte chauh an awm si a ni.

Chhan han tum chhin teh ang- chhandama awm tur chuan Isua rin a ngai a, tin Sabbath serh a ngai leh a, vawksa nghei te, zuk leh hmuam zawng zawng te nghei tel vek a ngai bawk a, sa I nghei tel theih a, chaw I nghei zauh zauh peih phei chuan I chhandamna chu a chiang leh zual mai thei - tiin han chhang ta ila, tamtak chuan dik lo in ti mai thei a, mahse dik ti lo chung si a mi tam takin kan pawm dan chu hetiang hi a ni.  A dik lo reng bawk a ni.  Chhandam nih nana thiltih leh Chhandam nih tawh avanga thiltih chu Chhim leh Hmar anga thil inang lo a ni.

Chhandama awm nan mihringin kan tihtheih hmasa ber chu tihtheih reng ka nei lo, tih pawm hmasak phawt hi a ni.  Mahni chaknaa arsi pakhat pawh kal thei lo hian engtin nge mahni chaknaa vanram chu kan thlen theih tehlul ang!  Mahni theihnaa kum 100 pawh dam thleng hlei thei lo hian mahni tumnain chatuan nunna i neih theih I ringa maw!   Mahni chakna chuan arsi chu lo kal theiin, kum 100  emaw, a aia rei emaw pawh lo dam thei ta tehreng pawh ni la,  vanram leh chatuan nunna chu I chakna rinchhan chuan neih tum lul suh ang che.  I thei chuang lovang.  Mihringina kan chakna rinchhana thil tha ti vea kan inhriat zawng zawng- inkhawm te, kohhrana chanvo neih te, ei leh ina insum te- hi Pathian thianghlim hmaah chuan tenawm vek an ni (Jer2:22; Isaia 64:6; 1 Kor 13:1-3).

Thalai leh nu leh pa tam tak, Kohhrana mifel tak tak leh inpezo tak tak, chhandam an nih leh nih loh chiang miah si lo.  Chhandamna a pek mial takin tia Pathian tihlawm tuma theih tawpa beite hi ka va hmu tam ta em!  Ka lo nih ve thin dan anih avangin heng mite ka hmuh hian ka rilruin ka rum thin.  Unaute u, chhandam nih nan Pathian khawngaihna ni lo, mahni thiltih i en chhung chu chhandam  i nih leh nih loh I chiang ngai lo vang.  Chhandamna chu I thiltih lam ni lovin Pathian thiltih lam zawk a ni. Chuvang chuan chhandam I nih leh nih loh hriatchian I duh chuan Pathian zawk en mai rawh.  Tihtheih engmah i neih ngang loh avangin Ani chuan a khawngaihnain a chhandam che a ni.  I sual man atan engmah pek theih I neih loh avangin Amah zawkin aman zawng zawng a lo pek tlak sak vek tawh che a ni.  Isua Krista thihnaah khan Pathian lung chu a awi tawk tawh a.  Thlamuang takin chu Pathianin Isua Kristaa chhandamna, a thlawna a pek tawhah che chuan chawl mai rawh.

A tifiah turin entirna pakhat han pe lawk ila,  Aizawl atanga Delhi zinna man atan mi hausa tuin emaw I zinna senso aia tam mah tur cheng nuai sawmhnih zet mai, a neih zawng zawng a pe lawih mai che a.  A khai, min pe tak tak lovang  tia I rinhlelh chhung chu chutiang zat pawisa chu i kutah awm mahse, Delhi chu rilru thlamuangin i kal thei lovang;  anih loh paw’n nuai sawmhnih chuan ka thleng zo in ka ring thei tlat lo, khawnge a belhchhah turin kan inhlawh teh ang i ti anih chuan cheng nuai sawmhnih leh a petu chu i ring zo lova i ngaisang lo hle tihna a ni.  Chutiang chiah chuan vanrama kan kal theih nan Pathian chuan a neih zawng zawng, a Fapa mal neihchhun nunna min lo pe tawh a ni.  Nang leh kei vanrama kan kal theih nan Pathian Fapa sualna reng nei lo chu krawsah tihhlumin a awm asin.  Vanram I kal theih nan hian chubak chu Pathian meuh pawh hian pek theih a nei tawh lo.  Heti taka thilthlawnpek hlu pawm duh tlat loh leh rin zawh tlat loh hi sual a ni.  Chhandam nih nana thil tha tihbelh tlat tum hi chhandamna leh a petu ngaihnepna leh rinlohna zawk a ni.  Mahse tam takin kan ti si a ni.

Rom 4:4,5-ah Paula chuan, “Hnathawktu hlawh chu khawngaihnaa ruat a ni lo va,bata ruat a ni zawk e.  Amaherawhchu hna thawk lova, Pathian ngaihsak lo, thiam chantirtu ring zawka rinna chu, ama felnaa ruat a ni.” tiin a lo ziak.  Chhandamna hi thiltha tiha hlawh chhuah theih chi a ni lova, thilthlawnpek a ni zawk e.  Helai Bible chang hi ka hrilhfiah changin a tifiah turin mi hnenah pawisa emaw thil engemaw an hnenah ngei zuk kalin ka pe thin a.  Kohhran pakhata ka hrilhfiahna atana pen thar ka pek pa chu a lawm hmel ka hmu tlat lo mai a.  Inkhawm ban velah chuan ka pen pek pa chuan, “kha le, entirna’n I pen min pek kha” tiin min rawn pek let a tum a, tah chuan nui chung hian, “khai, ka pe daih tawh che alawm; ka pe che tih I pawm loh vang ani maw I lawm tak tak miah loh” ka ti a.  Chutiang deuh chuan Pathian chuan chatuan nunna hi Krista zarah a thlawn tak meuh meuhvin min lo pe a, mahse a hluin a tha lutuk a, min pek tak tak kan ring lo fo thin a ni.  Mahse unau, a pe tak tak che a ni.  A pek chhan che chu maw, I dam chhung emaw chatuan emaw pawhin nangmah chuan hlawh chhuah tumin bei mah la, I hlawhchhuah theih ngai dawn chuang loh vang a ni.  I tan kawng dang a awm ngang loh avangin Pathian zawkin a thlawnin a rawn pe ta mai che a ni.

A thlawn kan ti ringawt pawh hi, engmah hi a thlawnin a awm tak tak thei lo.  A man midangin min pek sak hi a thlawn kan ti zawk mai thin.  Mi tuin emaw computer a thlawnin a pe che anih chuan, a petu che chuan computer man chu a peksak che a, a thlawna I lo dawnna ai kha ani sum leh pai a hek thung a ni.  Chutiang chiah chuan Chhandamna pawh hi a thlawn anih rualin, a man min peksaktu an awm vang chauh a ni.  Chhandam i nihna man tluka to hi he Universe-ah hian a awm thei tawh lo.  Engkim Siamtu Krista nunna chu Chhandam i nihna man atan Pathianin  a lo pe anih chu!  Chu chu tawk I ti lo anih chuan eng thil dangin nge I belhchhah theih tawh chuan ang le?  Pathian meuh pawhin a neih zawng zawng, a neihchhun Chhandam i nih nan hian a seng ral raih a ni.  Belh leh chuan tur a awm thei tawh lo.  Ka tan a ni he thilthawnpek hi tia lo pawm mai hi i tihtur chu a ni mai!  Aw a va tlawm em, chuti taka Chhandamna man to chu I ta leh ka ta athlawnin a  lo ni ta mai anih chu! Ava mak em!  Krista zarah chatuana nung tur I lo ni reng tawh anih chu! Lalpa chu fakin awm rawh se.

Chuti taka thil manto chu engah nge pek i nih le? Johana 3:16-ah chuan, “Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan”  tiin a lo ziak a.  Chuvang chuan Pathianin he chhandamna a pek nachhan che chu engdang a ni lo, a hmangaih che a, chatuana nang nen awmdun a duh vang a ni.  Chuti taka hmangaihna nasa leh thilthlawnpek hlu chu I hnawl thei dawn em ni?  Tunah khan thingthi la, Pathian hnenah chhandamna, Isua Krista thihna avanga athlawna a pek che avangin lawmthu hrilh ang che.  AMEN.