HMANGAIHNA TEL LO SAKHUANA (Short Sermon)

“Mihring țawngte leh vantirhkoh țawngtein thu sawi mah ila, hmangaihna ka neih si loh chuan dâr, ri mai mai emaw, dâr benthek, ri mai mai emaw ka lo ni ang.  Tin, thu hrilh theihna neiin, thuruk zawng zawng leh hriatna zawng zawng hre vek mah ila, tlang sawn theihna khawp hial rinna famkim nei mah ila,  hmangaihna ka neih si loh chuan engmah ka ni lo vang.  Tin, mi retheite chawm nan ka sum zawng zawng pe vek mah ila, ka taksa pawh kâng turin inpe mah ila, hmangaihna ka neih si loh chuan ka tan engmah a sawt lo vang”  (1 Korinth 13:1-3).

A chunga thu ziak khi Bible Thianghlima inziak chu ni lo se la chuan ka awi kher lo vang!  Thil ni thei lo nia lang tam tak a awm tlat a ni.  Mihring țawng mai ni lo, vantirhkohte țawng meuh pawh in thusawi thei ila, hmangaihna tel lo chuan engmah ka ni dawn lo anih chu!  Pathian thusawi thiam hmingthang niin, Pathian thuril zawng zawng hre vek mah ila, hmangaihna tel lo chuan engmah a ni chuang lo.  Rinna, damlo tihdam theihna mai mai ni lo, tlang awmna hmun sawn dawrh theihna hial khawpa famkim  nei mah ila, hmangaihna hi a la neih lo theih cheu mai bawk!  Chu aia la mak chu ka in leh lo, neih sum zawng zawng leh ka taksa ngei pawh hi midang tan pe vek mah ila, hmangaihna a la neih loh theih tho mai! Chu hmangaihna tak mai chu a awm loh chuan engmah a ni chuang lo leh nghal.

Taksa pawh midang tana kâng tura inpek hnuah pawh hmangaihna chu a la neih loh theih cheu dawn em ni? In ti pawh a ni mai thei.  Ni e, zuk leh hmuam nghei vek hnuah te, Sabbath serh thianghlim em em chungte pawh hian hmangaihna hi a la neih loh theih cheu  tlat nia!  Isua lokal lehna hmasa-ah khan Judate’n Messia lokal tura kha hnamdang (Jentail-te)  laka inserh hranna leh pawn lam invawn thianghlimna ațangin lo hmuah an tum a.  Mahse a pawimawh zawk chhung lam inbuatsaihna- hmangaihna leh khawngaihna, Pathian ațanga felna te- an hlam chhiah a.  Chuvang chuan vanduai thlak takin hnam thlan bik, Sabbath serh thianghlim em em a, thianglo leh bawlhhlawh reng reng khawih pawh khawih duh lote kha Isua khengbettu te an ni ta.  Hmangaihna tel lova Pathian thuawih tumte chu chutiang chu an ni țhin. 

Anih leh chuti taka pawimawh hmangaihna chu engtia neih tur nge ni ta ang le?  Neih theih dan kawng awmchhun chu nangma chakna chuan I nei thei lo ani tih hriat chian phawt a ni.  Suala mihringte kan tluk hma kha chuan nungchang-ah leh hmangaihnaah țhafamkima siam kan ni, mahse kan nu hmasa berin duhâmna leh ropui zawk duhna, mahni hmasialna kawng zawha Pathian a hêlsan tak ațang kha chuan, hringfa piang tawh phawt te thinlung chu duhamna leh ropui zawk duhnain a khat zo ta.  Chuvang chuan Pathian chuan a nihphung- hmangaihna hi mihringte hnenah kawng tam takin la puang chhuak mah se, mihringte’n keimahni chuan chu hmangaihna awmzia tak tak chu kan hre zo tawh lo va,  hre teh reng pawh ni ila, kan nunpui thei tawh lo. 

Chuvang chuan Isua Krista, Pathian Fapa chu he leiah hmangaihna diktak mai min rawn hrilhfiah a, min rawn neihtir leh turin a lo kal a.  Ropuina aiah tlawmna, lalthuthleng aiah ran chaw pekna thleng, chawimawina aiah tihduhdahna, hausakna aiah retheihna, phuba lakna aiah ngaihdamna, huatna aiah hmangaihna, thuneihna aiah kraws chu rawn thlangin, hmangaihna chu mahni inhai vurna lam ni lovin, midang tana inhman ral raihna zawk a ni tih min rawn zirtir a.  A hnung zui duh zawng zawngte pawh chu hmangaihna kawng chu zawh tura koh kan ni.  Mahse he thinlung, thil dang zawng zawng aia bumhmang ber chhe lailet der hian chu chu a thei lo.  Chuvang chuan chu hmangaihna neitu Isua hnenah chuan kan thinlung hi vawi khat mai ni lo, engtik lai pawhin hlan ila, awmlo ata awma min Siamtu chuan suala khat kan thinlung hi ama nungchang ang turin min siamțhat sak leh dawn a ni.